HOYAK PANGGUANG AJO … Wayoiiiik

Tadi baru pulang baralek adiak kawan di Kampuang Dalam Piaman Laweh. Dak paralu heran kalau urang Piaman baralek indak di hari Sabtu jo Minggu. Hari Sinayan, Raba’a atau hari karajo nan lain bae lah, asa indak balantak jo hari balai se. Denai cigok kantua gak satangah hari dulu, baru di hoyak Honda Beat Hitam turun dari bukik karimuntiang manuju pasisia lauik nan banyak urang manggaleh sala lauak nan tanamo sadunia tu … hehehehe…

Sabalum tu kasitu tasangkuik pulo denai di kampus UNP, mananyo2 tantang masin fotocopy nan hasih awam dek denai sakalian lapeh taragak jo Bang Alen (Patugaih fotocopy Kopma UNP). Basobok pulo jo Pengurus Kopma nan periode kini, kanai tanyo pulo tantang baa caro ma usulan dana tuak renofasi PKM UNP nan lah patuik pulo di cat ulang. Babagi pulo pangalaman gak sangenek sambia baco Koran Ganto (Koran Mahasiswa UNP) nan baru tabik duo hari nan lalu. Sudah lapeh taragak, ba ansua lah jalan ko ka arah piaman nan laweh. Tibo di Lubuak Buayo kanai telepon pulo dek mandan coki duo lokang (Ajo Deri) nan kabetulan juo ka pai ka tampek lokasi alek kawan kito ko, tapi ndak soghang je doh, jo supiak nan kamek pulo manyarato dilakang eee….

Tapaso lah manunggu gak subanta di bawah jembatan layang nan ka duo di Sumbar ko buliah bisa pai bairiangan se. Buliah agak dakek, dibae lewaik jalan motong alias jalan taplau (katapiang – ulakan- kota piaman). Lah takajuik pulo denai, ruponyo jalan eee lah ba aspal sampai simpang ka katapiang. Dek sakin takjub nyo ampia dak nampak oto dari arah balawanan malaju kancang, ampia pulo denai kanai serempet plus kalason gadang sambia basorak :“HOOOOIIIII”. Tapenajat lah denai, untuang lai indak kanai. Mode ko lah urang-urang  nan sadang mancubo aspal baru, biaso eee lambek-lambek se dek jalan tanah, kini sajak ba aspal lah jadi sirkuit pulo mode balapan nan ditayangkan dek TiPi, kok nadak salah namo acara ee Ef One (indak do sangkuik eee jo One si Ef doh). Lah kanai galak an pulo denai  dek Ajo Deri garah-garah nan santa ko.

(Pelajaran partamo : Hati-hati di jalan, fokus se ka mungko dan jan lupo caliak-caliak juo ka spion jo kanan kiri, antah ado WaWau bagai nan manyubarang, nan paliang babayo tu, ado WaWau mambaok Oto atau jo Honda  di tangah labuah …. Oke).

Trus… apo hubungan ne jo judul di ateh ….

Haaaaa ...

Saba gak santa lu yo kawan2 …

Mode ko cito ee :

Yo bana rami alek adiak ketua kito ko (Roby). Tambah rami dek ulah nan mambaok acara orgene … Ghaso mancaliak ajo andre mahoyak pangguang. Banyak pulo cito ee sambia balagu nan buek tamu galak sampai talua gulo2 nan ado dimuncuang denai ko. Kiro2 mode ko cito ee, untuang2 se lai pulo di sambuang de Ajo Deri nan juo manjadi saksi mato di sampiang denai ko.

Carito Partamo :

Ado urang gaek, hiduk ee susah se saumua hiduik ee, sampai lah ciek-ciek anggok eee ko. Dek mamoe ampia ka mankat, tu bakumpua lah si buyuang jo si upiak (anak2 ee sadonyo).

“Yuang … Piak …. Danga an lah pasan tarakhir dari Apak ang ko”, rintiah si Apak sambia ma hiruik anggok panjang nan tingga ciek-ciek.

“Apo tu pak, sampaian je lah”, jawek si buyuang sambia ma ibo.

“Pasan den ciek nyeh : Tolong ang jago monaih (tugu monas) nan tinggi tu yo ….”, Pasan si Apak.

Sudah tu dak manggaghik Apak tu lai satalah manyampaian pasan taghakhir ee tu.

Tu takajuik dek panasaran si Buyuang mandanga eee nan sampai kini hiduk eee susah je taruih. Sambia manggoyang bahu si Apak nyo batanyo :

“Tuu apo lai pak ??? Ado ameh kito di monaih tu pak … Jawek lah Paaaaaak ???”.

Tasentak lah Apak eee tu untuak nan taghakhir kali nyo, sambia manjawek :

“Dak ado ameh kito disitu doh, tu makonyo den pasanan supayo ang jago, jan ang gaduah pulo ameh di monaih tu  yuang “.

Baru lah mangkat Apak nan lah tuo tu mangkat ningga an si buyuang jo supiak nan sadiah sambia manggeleng-gelengan kapalo.

Carito Kaduo :

Ado rang kampuang kito, profesi sahari-hari eee manurunan karambia. Kini lah modern pulo we eek lo, lah ba Honda pulo pai karajo. Tibo di labuah gadang kanai peluiiik dek Pak Polisi Lantas.

“Priiiiiiiiiiit”, ambuih Pak Pol Tu baghang.

Takarenjek urang kampuang kito tu dek ee,  sambia mambaghantian laju Honda eeee tuw.

“Ba a dak bahelem apak?”, tanyo Pak Pol tu ghaghang.

“Awak mambonceang je nyeh pak, nan mambaok dak awak doh”,  jawek nyo sambia manunjuak ka baruak nyo nan duduak di muko.

 Geleng-geleng se Pak Pol mandanga jawek Apak tu.

Mode tu kiro-kiro carito eee, tantu indak salawak Ajo tu nan mambaok an, karano ambo dak gadang di surau doh nan mode disabuik dek Ajo deri tadi. Emang apo hubungan ne gadang di surau jo bakat malawak yo ….? Hayo dak tau pulo denai ko doh … Mungkin sarancak eee kito tanyo je lah ka Ajo deri nan lawak ko (mungkin we ee gadang di surau samo jo Ajo nan mambaok acara orgen alek tadi).

Sambuang cito di ateh ko Jo Deri …..
Kami tunggu….

Chalidbest (25 April 2011)
Padang- Kampuang Dalam  (Nunggu hujan taduah di jalan)
Pulang cek lu, si Bungsu Ultah pulo di rumah.